समृद्ध बर्दगोरिया सुखी गाउँबासी

बर्दगोरिया गाउँपालिका नेपालको सुदूरपश्चिम प्रदेश अन्तर्गत कैलाली जिल्लाको निर्वाचन क्षेत्र नं. २ मा, प्रदेश राजधानी अतरियादेखि ५० किलोमिटर पूर्व तथा पूर्व-पश्चिम राजमार्गको काखमा अवस्थित एक अत्यन्तै महत्त्वपूर्ण, ऐतिहासिक तथा साङ्गठनिक रूपमा ६ वटा वडाहरूमा विभाजित स्थानीय तह हो। साबिकका दोधरा र कोटातुल्सिपुर गाउँ विकास समितिहरूलाई समायोजन गरी स्थापना गरिएको यस गाउँपालिकाको नामाकरण यहाँ रहेको प्रसिद्ध धार्मिक, सांस्कृतिक तथा पर्यटकीय स्थल बर्दगोरिया धामको नामबाट गरिएको हो, जहाँ रहेको प्राचीन शिव मन्दिर र बर्दगोरिया ताल धार्मिक आस्थाका प्रमुख केन्द्र मानिन्छन् र शिवरात्रि तथा माघे सङ्क्रान्तिमा ठूलो मेला लाग्ने गर्दछ। भौगोलिक रूपमा २८.२५० उत्तरी अक्षांश, ८१.२४० पूर्वी देशान्तर र समुद्र सतहबाट १९१ मिटर उचाइमा रहेको कुल ७७.३ वर्ग किलोमिटर क्षेत्रफलको यस पालिकाको पूर्वमा लम्कीचुहा नगरपालिका, पश्चिममा घोडाघोडी नगरपालिका, उत्तरमा मोहन्याल गाउँपालिका र दक्षिणमा जोशीपुर गाउँपालिकासँग सीमा जोडिएको छ। प्रायः समथर र उर्वर भूभागमा फैलिएको तथा उष्ण उपोषण एवं समशीतोषण हावापानी पाइने यस पालिकाको कुल क्षेत्रफलको करिब १५.०९ वर्ग किलोमिटर भू-भाग सामुदायिक, कबुलियत, धार्मिक तथा सरकारी संरक्षित वन क्षेत्रले ओगटेको छ। काँढा र कुइरा नदीका साथै साना-ठूला खोल्सा तथा कुलोहरू बग्ने हुनाले यहाँ प्रशस्त मात्रामा नदीजन्य स्रोत-साधन उपलब्ध हुनुका साथै यातायात सहजताका लागि विभिन्न साना-ठूला पुल तथा कलभर्ट संरचनाहरू निर्मित छन्। यहाँ थारू, क्षेत्री, बाहुन, जनजाति र दलित समुदायको मिश्रित बसोबास रहेकाले थारू र पहाडी संस्कृतिको अनुपम एवं सुन्दर सङ्गम देख्न पाइन्छ। स्थानीय बासिन्दाको मुख्य पेसा कृषि भएकाले यहाँ धान, गहुँ, मकै, तोरी र तिलजस्ता खाद्यान्न तथा नगदे बालीहरूको राम्रो उत्पादन हुने गर्छ। बौनिया र मुडा जस्ता तीव्र गतिमा विकास भइरहेका व्यापारिक केन्द्रहरू, सुदृढ सडक पूर्वाधार, गुणस्तरीय शिक्षा, स्वास्थ्य क्षेत्रमा भइरहेको सुधार र धार्मिक पर्यटनको प्रवर्द्धनले गर्दा बर्दगोरिया गाउँपालिका समग्र कैलाली जिल्लामै आर्थिक एवं सामाजिक समृद्धिको दिशातर्फ द्रुत गतिमा अगाडि बढिरहेको छ।